Patay ang isang ahas matapos itong kagatin ng isang lalaki sa lalawigan ng Bohol.
Base sa ulat ni Police Staff Sargeant Andy Calcaben ng Antequera Police, bigla na lamang umano inatake si Boljulio Aleria ng isang reticulated python habang siya’y nagmamaneho ng kaniyang motorsiklo sa Barangay Quinapon-an sa bayan ng Antequera.
Sa pag-atake ng ahas ay natuklaw siya nito sa kaniyang kamay at braso kung saan pumulupot din aniya sa kaniya ang ahas.
Dahil dito, ginamit ni Aleria ang isa pa niyang kamay upang mahawakan ang ulo ng ahas at nang mahawakan ay kinagat na niya ito.
Tumagal pa ng 10 minuto ang sagupaan ni Aleria at ng ahas bago ito tuluyang namatay.
Tumulong naman ang mga residente sa lugar at itinakbo sa pagamutan ang naturang lalaki kung saan siya ay nagpapagaling magpahanggang ngayon.
Samantala, maayos namang nai-dispose ng mga awtoridad ang namatay na ahas.
0 Comments