Bus nasunog habang papunta sa Tuguegarao City, Mga pasahero ligtas lahat.

Walang sinomang nasaktan sa mga pasahero ng JD Dalin Transport bus na naiulat na nasunog kaninang 5:15 ng umaga. 

Batay sa inisyal na ulat ng PNP- Tuguegarao City, binabagtas ng Dalin Bus na may plakang NAQ 6657 ang kahabaan ng national highway sa Brgy. Namabbalan, Tuguegarao City nang biglang sumabog ang kanang likurang gulong ng bus.

Ayon umano sa bus driver na si Edwin Asuncion, 48 anyos ng Bantug, Roxas, Isabela, agad niyang ipinagilid ang bus at nang bumaba ay nasusunog na umano ang sumabog na gulong.

Agad niya umanong pinababa ang lahat ng pasahero tungo sa mas ligtas na lugar.

Naitawag naman sa Bureau of Fire Protection -Tug ang nasabing pangyayari at naapula ang nasusunog na bus bandang 6:05 ng umaga. 

Patuloy naman ang isinasagawang imbestigasyon ng Tuguegarao Fire Station sa pangyayari.