BATA, AKSIDENTENG NABARIL SA ULO NG BOGA GUN

Isinugod sa pribadong ospital sa lungsod ng Puerto Princesa ang 13-anyos na batang lalaki matapos na aksidenteng mabaril ng Boga Gun sa Barangay Malcampo, Roxas, Palawan bandang alas-tres ng hapon nitong Sabado, Ika-25 ng Nobyembre.

Ayon sa PNP, nangangawil umano sa ilog ang biktima kasama ang kanyang kaibigan nang makita nila ang boga gun ng isang lalaki na sumisisid sa lugar.

Dinampot umano ito ng isang bata habang ang biktima ay sinilip ang butas ng baril kung saan aksidente naman nakalabit ang gatilyo na loaded pala ng isang 'improvised spear'.

Tinamaan sa kaliwang mata ang biktima at bumaon naman sa kanyang bungo.

Samantala, isinugod sa Roxas Medicare Hospital ang biktima ngunit inilipat din sa Ace Medical Center sa Puerto Princesa.