Bangkay ng bagong silang na sanggol, Natagpuan sa kanal sa Dagupan.

Isang bangkay ng bagong silang na sanggol na nakasilid sa plastic bag ang natagpuan sa isang kanal sa Barangay Zone 9 Malued sa lungsod ng Dagupan.

Ayon sa ulat ng GMA Regional TV One North Central Luzon, may umbilical cord pa umano ang nasabing sanggol nang namataan ito ng mga residente ngunit wala na itong buhay.

Kaugnay nito, agad na kumilos ang mga awtoridad upang magsagawa ng profiling sa mga buntis sa nasabing lugar upang matukoy ang pagkakakilanlan ng mga magulang ng sanggol.

Samantala, sinabi naman ng ilang residente na bago pa matagpuan ang bangkay ng sanggol ay isang babae umano ang namataang tila may sinusungkit sa nasabing kanal.

Nagpapatuloy naman ang imbestigasyon ng mga awtoridad upang matukoy kung sino ang nagtapon ng sanggol sa kanal.

“We are still looking at the possibility to look for the owner or mother ng nasabing infant. ‘Yung lifeless infant, malapit siya sa creek, hindi natin inaalis ‘yung anggulo na probably, it was washed away by the river,” ayon sa pahayag ni Dagupan City Police Station chief Police Lieutenant Colonel Vicente Castor Jr.